गोरखाको सिरानचोक गाउँपालिकाबाट फेसबुकमा बन्दुकको फोटो पोस्ट गर्ने र हतियार राख्ने दुई जना पक्राउ परेका छन्। प्रेम सुनारले आफ्नो फेसबुकमा भरुवा बन्दुकको फोटो हालेपछि प्रहरीले उनलाई नियन्त्रणमा लिएको थियो। अनुसन्धानका क्रममा उक्त हतियार विष्णु सुनारको भएको खुलेपछि उनलाई पनि प्रहरीले पक्राउ गरेको छ।
गोरखा । गोरखाको सिरानचोक गाउँपालिका–६ नयाँसाँघुबाट फेसबुकमा भरुवा बन्दुक बोकेको फोटो पोस्ट गर्ने र बिनालाइसेन्स भरुवा बन्दुक राख्ने दुई जनालाई प्रहरीले पक्राउ गरेको छ।
भीमसेनथापा गाउँपालिका–२ सुनारगाउँ घर भई हाल पालुङटार नगरपालिका–१ खोप्लाङमा ज्यामी काम गर्दै आएका ४३ वर्षीय प्रेम सुनारले आफ्नो फेसबुक आईडीमार्फत भरुवा बन्दुक बोकेको फोटो पोस्ट गरेपछि उनी पक्राउ परेका हुन्।
प्रेम सुनारलाई लाइसेन्स नभएको एक थान भरुवा बन्दुकसहित नियन्त्रणमा लिएर अनुसन्धान अघि बढाउने क्रममा उक्त हतियार पालुङटार नगरपालिका–१ खोप्लाङ बस्ने ३३ वर्षीय विष्णु सुनारको भएको खुलेको थियो। त्यसपछि प्रहरीले विष्णुलाई पनि नियन्त्रणमा लिएर थप अनुसन्धान गरिरहेको छ।
