सारांश
- अमेरिकाको जेलबाट छुटेका हन्डुरसका पूर्वराष्ट्रपति जुआन ओर्लान्डो हर्नान्डेजविरुद्ध अन्तर्राष्ट्रिय पक्राउ पुर्जी जारी गरिएको छ।
- हर्नान्डेजलाई लागूऔषध ओसारपसारमा संलग्न भएको आरोपमा अमेरिकामा ४५ वर्षको जेल सजाय सुनाइएको थियो।
- हर्नान्डेजमाथि सार्वजनिक पैसा हिनामिना गरेको आरोपमा अनुसन्धान भइरहेको छ, जसले वर्तमान र पूर्व राजनीतिज्ञहरूलाई लक्षित गरेको छ।
हन्डुरस । संयुक्त राज्य अमेरिकाको जेलबाट रिहा भएको केही दिनमै हन्डुरसका पूर्वराष्ट्रपति जुआन ओर्लान्डो हर्नान्डेजका लागि कानुनी र राजनीतिक उथलपुथल चुलिएको छ। देशको सर्वोच्च अभियोजकले उनीविरुद्ध अन्तर्राष्ट्रिय पक्राउ पुर्जी जारी गरेका हुन्।
महान्यायाधिवक्ता जोहेल एन्टोनियो जेलायाले सोमबार ‘एक्स’ मा एक पोस्टमार्फत सार्वजनिक अभियोजकको कार्यालयको मुख्य अनुसन्धान निकाय ‘एजेन्सिया टेक्नीका डी इन्भेस्टिगेशन क्रिमिनल’ लाई इन्टरपोललाई ‘पूर्वराष्ट्रपति जुआन ओर्लान्डो हर्नान्डेजविरुद्धको अन्तर्राष्ट्रिय पक्राउ पुर्जी कार्यान्वयन गर्न’ आग्रह गर्न निर्देशन दिएको जनाएका छन् ।
हर्नान्डेजकी श्रीमतीले भने उनी निर्दोष रहेको दाबी गर्दै सुरक्षा चिन्ताका कारण उनी तत्काल हन्डुरस नफर्किने र हाल उनी अमेरिकाको ‘सुरक्षित स्थान’ मा रहेको बताएकी छन्।
हर्नान्डेजलाई सन् २०२२ मा अमेरिका सुपुर्दगी गरिएको थियो। न्यूयोर्कका अभियोजकहरूले उनीमाथि लागुपदार्थ र हतियार सम्बन्धी तीनवटा अपराधको आरोप लगाएका थिए । उनले आफ्नो राष्ट्रपतिकाललाई हन्डुरसलाई ‘नार्को-स्टेट’ मा बदल्न प्रयोग गरेको आरोप लगाइएको थियो।
पछि अमेरिकी अभियोजकहरूले उनलाई दोषी प्रमाणित गर्दै हर्नान्डेजले हन्डुरस हुँदै अमेरिकामा कोकिन सार्नमा केन्द्रीय भूमिका खेलेको बताएका थिए। अभियोजकहरूका अनुसार, ‘विश्वको सबैभन्दा ठुलो र सबैभन्दा हिंस्रक लागूपदार्थ तस्करी षड्यन्त्रहरू मध्ये एक’ को आधारमा उनलाई ४५ वर्षको जेल सजाय सुनाइएको थियो।
यसैबिच, हर्नान्डेज आफ्नो देशमा चलिरहेको अनुसन्धानको केन्द्रमा रहेका छन्, जसले सार्वजनिक पैसा हिनामिना गरेको आशङ्कामा वर्तमान र पूर्वराजनीतिज्ञहरूलाई लक्षित गरेको छ। सन् २०२३ मा, धेरै पूर्व अधिकारीहरूसँगै उनीमाथि आफ्नो राजनीतिक अभियानका लागि राज्यको कोषबाट १ करोड २० लाख डलर भन्दा बढी रकम कथित दुरुपयोगमा संलग्न भएको आरोप लागेको थियो।
अमेरिकी राष्ट्रपति ट्रम्पले हन्डुरसको नोभेम्बर ३० को राष्ट्रपतीय निर्वाचनमा हर्नान्डेजको दक्षिणपन्थी राष्ट्रिय पार्टीका सदस्य तथा राष्ट्रपतीय उम्मेदवार नास्री ‘टिटो’ अस्फुरालाई समर्थन गर्न आग्रह गरिरहँदा उनलाई माफी दिने निर्णय आएको हो।
गत हप्ता ट्रम्पले सामाजिक सञ्जाल पोस्टमा लेखेका थिए, ‘म पूर्वराष्ट्रपति जुआन ओर्लान्डो हर्नान्डेजलाई पूर्ण माफी दिनेछु, जसलाई मैले धेरै सम्मान गर्ने धेरै मानिसहरूको भनाइ अनुसार, धेरै कठोर र अनुचित रूपमा व्यवहार गरिएको छ।’
९७ प्रतिशत मतपत्र गनिसक्दा अस्फुराले ४०.५२ प्रतिशत मत प्राप्त गरेका छन्, र उनी मध्यमार्गी प्रतिद्वन्द्वी साल्भाडोर नास्राल्लाभन्दा करिब ४२,१०० मतले अगाडि छन्।
मतगणनाको ८८ प्रतिशत मतपत्र प्रक्रियामा रहँदा गत शुक्रबार अस्थायी रूपमा रोकिएको थियो। राष्ट्रिय निर्वाचन परिषद्का अनुसार, करिब १६ प्रतिशत मतपत्रहरूमा अनियमितताहरू थिए, जसलाई थप समीक्षा आवश्यक थियो। यसका लागि परिषद्ले मतगणना प्रणालीको व्यवस्थापन गर्ने कम्पनीलाई जिम्मेवार मानेको थियो।
अन्तर्राष्ट्रिय पर्यवेक्षकहरूले अधिकारीहरूलाई मतगणना प्रक्रियालाई छिटो गर्न र मतदाताहरूलाई यसको निष्ठाको बारेमा आश्वस्त पार्न कदम चाल्न आग्रह गरेका छन्।
