सुप्रिम सहकारी ठगी प्रकरणमा थुनामा रहेका राष्ट्रिय स्वतन्त्र पार्टीका सभापति रवि लामिछाने र पूर्व गोर्खा मिडिया सञ्चालक छविलाल जोशीको मुद्दाको पेशी आजका लागि पुनः तोकिएको छ ।
उच्च अदालत तुलसीपुर, बुटवल इजलासले आजका लागि सुनुवाइको मिति तय गरेको हो । यसअघि कानुनी पक्षबाटै पटक–पटक माग भएपछि स्थगित हुँदै आएको यो मुद्दालाई आजको पेशीमा महत्त्वपूर्ण रूपमा हेरिएको छ ।
लामिछाने र जोशीमाथि सुप्रिम सहकारीको रकम ठगी र संगठित अपराधको आरोपमा १० करोड ९९ लाखभन्दा बढीको सामूहिक बिगो कायम गरिएको छ । दुवैले आफ्नो हिस्साको २ करोड ७४ लाख रुपैयाँ बराबरको जमानत पेस गरे पनि अदालतले उनीहरूलाई थुनामै राखेर मुद्दाको पुर्पक्ष गर्न आदेश दिएको थियो ।
हाल लामिछानेलाई भैरहवाबाट काठमाडौंको नख्खु कारागारमा सारिएको छ भने जोशी भैरहवा कारागारमै छन् । मुद्दा बारम्बार स्थगित हुँदा न्यायिक प्रक्रियामा ढिलाइ भइरहेकाले आजको सुनुवाइलाई चासोका साथ हेरिएको छ ।
